રહેવાસીઓને વધુ સેવા આપવા શહેરોને મદદ

લોકો રોજિંદા જીવનમાં જે ઘણી સેવાઓ પર આધાર રાખે છે, તે શહેર સ્તરે પૂરી પાડવામાં આવે છે. સ્થાનિક સરકારો લોકોને આરોગ્યસંભાળ અને સહાય મેળવવામાં, પ્રતિકૂળ હવામાન માટે તૈયાર થવામાં, આર્થિક તકો શોધવામાં અને પોતાના સમુદાયને આકાર આપતા નિર્ણયોમાં ભાગ લેવામાં મદદ કરે છે.

શહેરોના વહીવટીતંત્રો પાસે મર્યાદિત સંસાધનો સાથે વધુ કામ કરવાની અપેક્ષા રાખવામાં આવે છે. AI આધારિત ઉકેલો જાહેર સંસ્થાઓને સમસ્યાઓનો વહેલો અંદાજ મેળવવામાં, માહિતી વધુ સુલભ બનાવવામાં અને સરકારી કર્મચારીઓને તેમના કામ માટે વધુ સારાં ટૂલ આપવામાં મદદ કરી શકે છે. આ સંભાવનાઓને વધુ સારી સેવાઓમાં ફેરવવા માટે સ્થાનિક નિપુણતા, તકનીકી જ્ઞાન અને સંસાધનો ધરાવતી સંસ્થાઓની જરૂર છે. આવી સંસ્થાઓ શહેરોના વહીવટીતંત્રો સાથે મળીને કયા ઉકેલો કામ કરે છે તે ચકાસી શકે અને સફળ અભિગમોને જવાબદારીપૂર્વક વિસ્તારી શકે.

આજે OpenAI Foundation અને ધ રોકફેલર ફાઉન્ડેશન સિટીઝ ડિલિવર: જાહેર સેવાઓ માટે AI ઉકેલો⁠ શરૂ કરી રહ્યાં છે. $50 મિલિયનની આ પહેલ શહેરોના વહીવટીતંત્રો સાથે કામ કરીને AI દ્વારા રહેવાસીઓની સમસ્યાઓ ઉકેલતી સંસ્થાઓને ટેકો આપશે.

સિટીઝ ડિલિવર વિશ્વભરમાંથી ખુલ્લી અરજીઓ મંગાવીને 24 મહિનાના ગાળા માટે $500,000થી $2 મિલિયન સુધીનું અનુદાન આપશે. આ પહેલનો ધ્યેય એવી સંસ્થાઓને ભંડોળ પૂરું પાડવાનો છે, જે સામૂહિક રીતે વિશ્વભરના શહેરોમાં રહેતા 10 કરોડ લોકો સુધી પહોંચી શકે.

શહેરો જે સમસ્યાઓ ઉકેલવા માગે છે, ત્યાંથી શરૂઆત

સિટીઝ ડિલિવર એવા પ્રોજેક્ટો શોધી રહ્યું છે, જે સ્થાનિક પ્રાથમિકતાઓ પર આધારિત હોય અને જાહેર સેવાઓ વધુ સારી રીતે પૂરી પાડવા માટે અત્યાધુનિક AI ટૂલની નવીનતમ ક્ષમતાઓનો ઉપયોગ કરતા હોય.

આ ખુલ્લા અરજી આમંત્રણમાં ચાર ક્ષેત્રો પર ધ્યાન આપવામાં આવશે:

• જાહેર આરોગ્ય: પ્રાથમિક સ્તરની સંભાળ, રોગો પર દેખરેખ, વિકલાંગજનો માટેની સેવાઓ, ખાદ્ય સુલભતા અને પોષણ સહિત જાહેર આરોગ્ય વ્યવસ્થાની પહોંચ અને સજ્જતા વધારવી.

• આર્થિક ઉન્નતિ: બેરોજગાર અને પૂરતો રોજગાર ન મેળવતા રહેવાસીઓને આવક, કૌશલ્યો અને સહાય સાથે જોડવા. આમાં સહાય યોજનાઓમાં નોંધણી, કારકિર્દી માર્ગદર્શન, કૌશલ્ય આધારિત ભરતી અને નોકરીદાતાઓની જરૂરિયાતો મુજબની તાલીમનો સમાવેશ થાય છે.

• પર્યાવરણીય સંકટો સામે ટકી રહેવાની ક્ષમતા: જાહેર સલામતી, ઇમરજન્સી સેવાઓ, ઊર્જા ઇન્ફ્રાસ્ટ્રક્ચર અને જમીન વ્યવસ્થાપન જેવા માધ્યમો દ્વારા શહેરોને પર્યાવરણીય આફતોનો અંદાજ મેળવવામાં, તેમનો સામનો કરવામાં અને તેમાંથી બહાર આવવામાં મદદ કરવી.

• નાગરિક સહભાગિતા: શહેરોના વહીવટીતંત્રોને સામેથી રહેવાસીઓ સુધી પહોંચવામાં અને વધુ ઝડપથી પ્રતિભાવ આપવામાં મદદ કરતા ઉકેલો. તેમાં દ્વિમાર્ગી સેવા માધ્યમોથી માંડીને સહભાગી નિર્ણયપ્રક્રિયા સુધીનો સમાવેશ થાય છે. તેમાં ડિજિટલ સુલભતા અને જોડાણ, અદાલતી સેવાઓ તેમજ પરવાનગી અને નિયમનકારી પ્રક્રિયાઓનો સમાવેશ થાય છે. મતદાન કે ચૂંટણીને લગતા પ્રોજેક્ટોનો સમાવેશ થતો નથી.

શહેરો પહેલાંથી જ વાપરે છે તેવાં વ્યવહારુ ટૂલ અને સિસ્ટમો સાથે અત્યાધુનિક AIને જોડતા પ્રોજેક્ટોને સિટીઝ ડિલિવર આવકારે છે. અરજદારો પોતાની જરૂરિયાતોને શ્રેષ્ઠ રીતે અનુરૂપ AI મોડલો અને ઉત્પાદનો પસંદ કરી શકે છે જેમાં OpenAIની ટેકનોલોજીનો ઉપયોગ કરવો જરૂરી નથી અથવા તેને કોઈ પ્રાધાન્ય આપવામાં આવતું નથી. સિટીઝ ડિલિવર એવી ટીમો શોધી રહ્યું છે, જેઓ જે સમુદાયોને સેવા આપવા માગે છે તેમની ઊંડી સમજ ધરાવતી હોય, સરકારી વ્યવસ્થામાં ટેકનોલોજી અમલમાં મૂકી શકતી હોય અને મૂલ્યાંકન, ગોપનીયતા, સુરક્ષા તથા લાંબા ગાળે કામ ચાલુ રાખવા માટે સ્પષ્ટ યોજનાઓ ધરાવતી હોય.

સિટીઝ ડિલિવર બે તબક્કે પ્રોજેક્ટોને ટેકો આપશે. $500,000થી લઈને $1 મિલિયન કરતાં ઓછી રકમનાં પ્રારંભિક અનુદાન સંસ્થાઓને શહેરના ભાગીદારો સાથે વિચારને વધુ વિકસાવવામાં, પ્રાયોગિક નમૂનો બનાવીને વાસ્તવિક વપરાશકર્તાઓ સાથે તેની કસોટી કરવામાં અને શહેરમાં ઉકેલનો પ્રાયોગિક અમલ કરવામાં મદદ કરશે. $1 મિલિયનથી $2 મિલિયનનાં વિસ્તરણ અનુદાન એવા ઉકેલોને ટેકો આપશે, જેમનો શહેરમાં પ્રાયોગિક અમલ થઈ ચૂક્યો હોય અને પ્રારંભિક પરિણામો મળ્યાં હોય. આ અનુદાન તેમને વધુ રહેવાસીઓ સુધી પહોંચવામાં અથવા અન્ય શહેરોમાં વિસ્તરવામાં મદદ કરશે.

દરેક પ્રોજેક્ટનું નેતૃત્વ પાત્ર સંસ્થાએ કરવું જોઈએ અને તે પરોપકારી હેતુ ધરાવતો હોવો જોઈએ. પાત્ર અરજદારોમાં બિનનફાકારક સંસ્થાઓ, જાહેર હિત માટે સ્થાપિત નિગમો અને અમુક નફાકારક સંસ્થાઓનો સમાવેશ થાય છે. દરેક પ્રોજેક્ટે શહેરના એવા વહીવટીતંત્ર સાથે ભાગીદારીમાં કામ પાર પાડવું જોઈએ, જે સમુદાય માટે પરિણામો અને અસર લાવવા પ્રતિબદ્ધ હોય. શહેરોના વહીવટીતંત્રો સીધી અરજી કરી શકતાં નથી. પાત્રતાના સંપૂર્ણ માપદંડો માટે પહેલની વેબસાઇટ⁠ જુઓ.

શહેરોના અત્યાર સુધીના અનુભવો પરથી આગળ વધવું

આ કામનું મૂળ ધ રોકફેલર ફાઉન્ડેશન અને OpenAIએ 2023માં શરૂ કરેલા પ્રયાસોમાં છે. ત્યારે તેમણે AI શહેરોની સેવાઓ કેવી રીતે સુધારી શકે તે જાણવા છ ખંડોના 40થી વધુ નાગરિક આગેવાનોને એકત્ર કર્યા હતા.

આ ચર્ચાઓમાંથી કોલંબિયાના કાલી, દક્ષિણ આફ્રિકાના કેપ ટાઉન અને બ્રાઝિલના રિયો ડી જાનેરોમાં પ્રારંભિક પ્રોજેક્ટો શરૂ થયા. Dengue.AI⁠ કાલીમાં રોગચાળો ફાટી નીકળવાની આગાહી કરે છે, જેથી જાહેર આરોગ્ય અધિકારીઓ જરૂર હોય ત્યાં નિવારક પ્રયાસો કેન્દ્રિત કરી શકે. કેપ ટાઉનમાં AI સંચાલિત મેસેજિંગ પ્લેટફોર્મ⁠ રહેવાસીઓને સ્થાનિક સરકાર સાથે સંવાદ કરવામાં મદદ કરે છે. રિયોમાં WhatsApp ચૅટબોટ⁠ પૂરની ચેતવણીઓ અને રહેવાસીઓના અહેવાલોને શહેરની ઇમરજન્સી પ્રતિભાવ સિસ્ટમો સાથે જોડે છે.

આ પ્રારંભિક પ્રોજેક્ટોના આધારે સિટીઝ ડિલિવર આશાસ્પદ અભિગમો ઓળખવા, રહેવાસીઓ અને સરકારી કર્મચારીઓ સાથે તેમની કસોટી કરવા તથા સફળ ઉકેલોને શહેરોની હાલની સેવાઓ અને પ્રણાલીઓમાં કેવી રીતે સામેલ કરવા તે શીખવા આગળ વધી રહ્યું છે.

AIના લાભોનું વિસ્તરણ

OpenAI Foundationનું ધ્યેય એ સુનિશ્ચિત કરવાનું છે કે આર્ટિફિશિયલ જનરલ ઇન્ટેલિજન્સ સમગ્ર માનવજાતને લાભ આપે. અમારો નાગરિક સમાજ અને પરોપકાર કાર્યક્રમ સમુદાયોને અત્યારે જ અને મોટા પાયે AIનો લાભ મેળવવામાં મદદ કરીને આ ધ્યેયને અમલમાં મૂકે છે.

સિટીઝ ડિલિવર અમારા આ પ્રયાસોને આગળ વધારે છે: જીવનરક્ષક તબીબી પ્રગતિના લાભ સૌ સુધી પહોંચે તે સુનિશ્ચિત કરવું⁠, નાના ખેડૂતો સુધી AI આધારિત હવામાન અને પાકના રોગોની આગાહીઓ⁠ પહોંચાડવી અને ઉપયોગી AI ટૂલ શક્ય તેટલી વધુ ભાષાઓમાં કામ કરે તે સુનિશ્ચિત કરવું⁠. તે લોકોને પ્રાધાન્ય આપતા AI ભંડોળ⁠ના કામને પણ આગળ વધારે છે. આ ભંડોળ બિનનફાકારક સંસ્થાઓને AI સ્થાનિક સમુદાયોને કેવી રીતે મદદ કરી શકે તે શોધવામાં સહાય કરે છે. સિટીઝ ડિલિવર દ્વારા અમે આ કામને એવી આવશ્યક જાહેર સેવાઓ સુધી વિસ્તારી રહ્યા છીએ, જેના પર રહેવાસીઓ દરરોજ આધાર રાખે છે. આ તમામ પ્રયાસોમાં અમે AIની પ્રગતિને સમસ્યાઓનો નજીકથી અનુભવ ધરાવતી સંસ્થાઓની નિપુણતા સાથે જોડીએ છીએ, જેથી નવી ક્ષમતાઓ લોકો માટે વ્યવહારુ લાભોમાં ફેરવાય.

સિટીઝ ડિલિવર માટે અરજીઓ હવે સ્વીકારવામાં આવી રહી છે. દરખાસ્તો (ટૂંકા વિડિયો સહિત) 29 નવેમ્બર 2026 સુધીમાં મોકલવાની છે.અહીં અરજી કરો⁠.