ვეხმარებით ქალაქების ხელისუფლებას, მეტი გააკეთონ მოსახლეობისთვის

ბევრ სერვისს, რომლითაც ადამიანები ყოველდღიურად სარგებლობენ, ქალაქის ხელისუფლება უზრუნველყოფს. ადგილობრივი ხელისუფლება ეხმარება ადამიანებს, ისარგებლონ ჯანდაცვის სერვისებით და სოციალური დახმარებით, მოემზადონ ექსტრემალური ამინდისთვის, იპოვონ ეკონომიკური შესაძლებლობები და მონაწილეობა მიიღონ გადაწყვეტილებებში, რომლებიც მათი თემების მომავალს განსაზღვრავს.

ქალაქების ხელისუფლებას შეზღუდული რესურსებით სულ უფრო მეტის გაკეთება მოეთხოვება. ხელოვნურ ინტელექტზე დაფუძნებულ გადაწყვეტებს შეუძლია საჯარო უწყებებს დაეხმაროს პრობლემების ადრეულ ეტაპზე პროგნოზირებაში, ინფორმაციის ხელმისაწვდომობის გაზრდასა და საჯარო მოხელეებისთვის უკეთესი სამუშაო ინსტრუმენტების უზრუნველყოფაში. ამ პოტენციალის უკეთეს სერვისებად ქცევას სჭირდება ორგანიზაციები, რომლებსაც აქვთ ადგილობრივი გამოცდილება, ტექნიკური ცოდნა და რესურსები, რათა ქალაქების ხელისუფლებასთან ერთად გამოცადონ მიდგომები და წარმატებული მიდგომის მასშტაბი პასუხისმგებლობით გაზარდონ.

დღეს OpenAI Foundation და როკფელერის ფონდი იწყებენ 50-მილიონდოლარიან ინიციატივას „Cities Deliver“: ხელოვნურ ინტელექტზე დაფუძნებული გადაწყვეტები საჯარო სერვისებისთვის⁠. ინიციატივა მხარს დაუჭერს ორგანიზაციებს, რომლებიც ქალაქების ხელისუფლებასთან ერთად ხელოვნურ ინტელექტს მოსახლეობის პრობლემების მოსაგვარებლად იყენებენ.

გლობალური ღია კონკურსის „Cities Deliver“ ფარგლებში გაიცემა 24 თვეზე გათვლილი გრანტები, თითოეულს 500 000-დან 2 მილიონი დოლარის ფარგლებში. ინიციატივის მიზანია, დააფინანსოს ორგანიზაციები, რომლებიც მსოფლიოს ქალაქებში მცხოვრებ ერთობლივად დაახლოებით 100 მილიონ ადამიანს ემსახურება.

ამოსავალი წერტილი: პრობლემები, რომელთა წინაშეც ქალაქები დგანან

Cities Deliver ეძებს ადგილობრივ პრიორიტეტებზე დაფუძნებულ პროექტებს, რომლებიც საჯარო სერვისების გასაუმჯობესებლად მოწინავე ხელოვნური ინტელექტის ინსტრუმენტების უახლეს შესაძლებლობებს იყენებს.

ღია კონკურსი ოთხ მიმართულებას მოიცავს:

• საზოგადოებრივი ჯანდაცვა: საზოგადოებრივი ჯანდაცვის სისტემების გაძლიერება და ხელმისაწვდომობის გაზრდა. ეს მოიცავს პირველად სამედიცინო დახმარებას, დაავადებათა მონიტორინგს, შშმ პირთა მხარდაჭერას, ასევე სურსათზე წვდომასა და სათანადო კვების უზრუნველყოფას.

• ეკონომიკური მობილობა: უმუშევარი და არასრულად დასაქმებული მოსახლეობის შემოსავლების ზრდა, მათთვის უნარების განვითარებისა და სოციალური მხარდაჭერის უზრუნველყოფა. ეს მოიცავს სოციალურ პროგრამებში ჩართვას, კარიერულ კონსულტირებას, შრომის ბაზრის მოთხოვნებზე მორგებულ სწავლებასა და კვალიფიკაციის შესაბამის დასაქმებას.

• გარემოსდაცვითი მედეგობა: ქალაქების მხარდაჭერა ეკოლოგიური კრიზისების პროგნოზირებაში, მათთან გამკლავებასა და შედეგების აღმოფხვრაში. ეს მოიცავს საგანგებო სამსახურების, საზოგადოებრივი უსაფრთხოების, ენერგოინფრასტრუქტურისა და მიწის მართვის სისტემების დახვეწას.

• სამოქალაქო ჩართულობა: გადაწყვეტები, რომლებიც ქალაქების ხელისუფლებას ეხმარება, საკუთარი ინიციატივით დაუკავშირდეს მოსახლეობას და უფრო სწრაფად უპასუხოს მათ საჭიროებებს — დაწყებული ორმხრივი მომსახურების არხებით გადაწყვეტილებების ერთობლივად მიღებით დამთავრებული. ეს მოიცავს ციფრულ ხელმისაწვდომობასა და კავშირს, სასამართლო სერვისებს, სანებართვო და მარეგულირებელ პროცესებს. არ მოიცავს ხმის მიცემასა თუ არჩევნებთან დაკავშირებულ პროექტებს.

Cities Deliver-ის ინიციატივაში მისასალმებელია პროექტები, რომლებიც მოწინავე ხელოვნურ ინტელექტს აერთიანებს ქალაქებში უკვე გამოყენებულ პრაქტიკულ ინსტრუმენტებსა და სისტემებთან. განმცხადებლებს შეუძლიათ აირჩიონ ხელოვნური ინტელექტის მოდელები და პროდუქტები, რომლებიც მათ საჭიროებებს ყველაზე მეტად შეესაბამება. OpenAI-ის ტექნოლოგიის გამოყენება არც სავალდებულოა და არც უპირატესობას ანიჭებს მათ. Cities Deliver-ში ვეძებთ გუნდებს, რომლებიც კარგად იცნობენ იმ თემებს, რომელთა დახმარებაც სურთ, შეუძლიათ საჯარო სექტორში ტექნოლოგიის დანერგვა და აქვთ შეფასების, კონფიდენციალურობის, უსაფრთხოებისა და გრძელვადიანი მდგრადობის მკაფიო გეგმები.

Cities Deliver-ის ფარგლებში პროექტები ორ ეტაპად დაფინანსდება. საწყისი გრანტები (500 000-დან 1 მილიონ დოლარამდე) ორგანიზაციებს დაეხმარება, ადგილობრივ მუნიციპალიტეტთან ერთად დახვეწონ იდეა, შექმნან და რეალურ მომხმარებლებზე გამოსცადონ პროტოტიპი, შემდეგ კი გადაწყვეტა ქალაქში საპილოტედ დანერგონ. გაფართოების გრანტები (1-იდან 2 მილიონ დოლარამდე) კი განკუთვნილია იმ გადაწყვეტებისთვის, რომლებიც ქალაქში უკვე გამოიცადა და პირველადი შედეგებიც აჩვენა — ეს დაფინანსება მათ მასშტაბის გაზრდაში, მეტი მცხოვრების მოცვასა თუ სხვა ქალაქებში გავრცელებაში დაეხმარება.

თითოეულ პროექტს უნდა ხელმძღვანელობდეს დადგენილი კრიტერიუმების შესაბამისი ორგანიზაცია და პროექტი საქველმოქმედო მიზანს უნდა ემსახურებოდეს. განაცხადის წარდგენა შეუძლიათ არაკომერციულ ორგანიზაციებს, საზოგადოებრივი სარგებლის კორპორაციებსა და ზოგიერთ კომერციულ ორგანიზაციას. თითოეული პროექტი უნდა განხორციელდეს ქალაქის ხელისუფლებასთან პარტნიორობით, რომელიც იღებს ვალდებულებას, მიაღწიოს შედეგებსა და სასარგებლო გავლენა ჰქონდეს თემზე. ქალაქების ხელისუფლებას განაცხადის პირდაპირ წარდგენა არ შეუძლია. მონაწილეობის სრული კრიტერიუმები იხილეთ ინიციატივის ვებსაიტზე⁠.

ქალაქებში დაგროვილი გამოცდილების განვითარება

ეს საქმიანობა აგრძელებს როკფელერის ფონდისა და OpenAI-ის მიერ 2023 წელს დაწყებულ მუშაობას. მაშინ მათ ექვსი კონტინენტიდან სამოქალაქო სფეროს 40-ზე მეტი ლიდერი შეკრიბეს, რათა განეხილათ, როგორ შეეძლო ხელოვნურ ინტელექტს ქალაქის სერვისების გაუმჯობესება.

ამ განხილვებს მოჰყვა პირველი პროექტები კალიში, კოლუმბიაში; კეიპტაუნში, სამხრეთ აფრიკაში; და რიო-დე-ჟანეიროში, ბრაზილიაში. კალიში Dengue.AI⁠ დაავადების აფეთქებებს პროგნოზირებს და საზოგადოებრივი ჯანდაცვის წარმომადგენლებს პრევენციული ზომების მიზანმიმართულად წარმართვაში ეხმარება. კეიპტაუნში ხელოვნურ ინტელექტზე დაფუძნებული მიმოწერის პლატფორმა⁠ მოსახლეობას ადგილობრივ ხელისუფლებასთან ურთიერთობაში ეხმარება. რიოში WhatsApp-ის ჩატბოტი⁠ წყალდიდობის შესახებ გაფრთხილებებსა და მოსახლეობის მოხსენებებს ქალაქის საგანგებო რეაგირების სისტემებს უკავშირებს.

Cities Deliver ეფუძნება ამ პირველ პროექტებს, რათა გამოვლინდეს პერსპექტიული მიდგომები და გამოიცადოს მოსახლეობასთან თუ საჯარო მოხელეებთან. ინიციატივის ამოცანაა, ქალაქის მოქმედ სერვისებსა და სისტემებში წარმატებული გადაწყვეტების ჰარმონიულად ინტეგრირების გზის შესწავლა.

ხელოვნური ინტელექტის სარგებლის ყველასთვის უზრუნველყოფა

OpenAI Foundation-ის მისიაა, უზრუნველყოს, რომ ზოგადმა ხელოვნურმა ინტელექტმა სარგებელი მოუტანოს მთელ კაცობრიობას. ჩვენი პროგრამა „სამოქალაქო საზოგადოება და ფილანთროპია“ ამ მისიას რეალობად აქცევს — ეხმარება თემებს, ხელოვნური ინტელექტის შესაძლებლობები ფართო მასშტაბით გამოიყენონ.

Cities Deliver ეფუძნება ჩვენს ძალისხმევას, რომ სასიცოცხლო მნიშვნელობის სამედიცინო მიღწევები ყველასთვის ხელმისაწვდომი იყოს⁠, მცირე ფერმერებმა მიიღონ ხელოვნურ ინტელექტზე დაფუძნებული პროგნოზები ამინდისა და მარცვლეულის კულტურების დაავადებათა შესახებ⁠ და ხელოვნური ინტელექტის გამოსადეგი ინსტრუმენტები რაც შეიძლება მეტ ენაზე მუშაობდეს⁠. ის ასევე ეყრდნობა ადამიანზე ორიენტირებული ხელოვნური ინტელექტის ფონდის⁠ საქმიანობას, რომელიც არაკომერციულ ორგანიზაციებს ეხმარება, გამოიკვლიონ, როგორ შეუძლია ხელოვნურ ინტელექტს ადგილობრივი თემების დახმარება. Cities Deliver-ის მეშვეობით ამ საქმიანობას ვავრცელებთ ძირითად საჯარო სერვისებზეც, რომლებითაც მოსახლეობა ყოველდღიურად სარგებლობს. ყველა ამ მიმართულებით ხელოვნური ინტელექტის მიღწევებს ვაერთიანებთ იმ ორგანიზაციების გამოცდილებასთან, რომლებიც პრობლემებს ყველაზე კარგად იცნობენ. ეს საშუალებას გვაძლევს, ახალი შესაძლებლობები ადამიანისთვის სასარგებლო რეალობად ვაქციოთ.

Cities Deliver-ში განაცხადების მიღება უკვე დაიწყო. საპროექტო წინადადებები (მოკლე ვიდეოს ჩათვლით) უნდა წარადგინოთ 2026 წლის 29 ნოემბრამდე. შეიტანეთ განაცხადი აქ⁠.