Օգնում ենք քաղաքներին ավելին անել բնակիչների համար

Բազմաթիվ ծառայություններ, որոնցից մարդիկ օգտվում են ամեն օր, մատուցվում են քաղաքային մակարդակում։ Տեղական ինքնակառավարման մարմիններն օգնում են մարդկանց օգտվել առողջապահական ծառայություններից և նպաստներից, պատրաստվել եղանակային ծայրահեղ պայմաններին, գտնել տնտեսական հնարավորություններ և մասնակցել իրենց համայնքների ապագան որոշող որոշումների կայացմանը։

Քաղաքային իշխանություններից ակնկալվում է ավելին անել սահմանափակ ռեսուրսներով։ ԱԲ լուծումները կարող են օգնել հանրային մարմիններին ավելի վաղ կանխատեսել խնդիրները, տեղեկություններն ավելի հասանելի դարձնել և հանրային ծառայողներին ավելի լավ աշխատանքային գործիքներ տրամադրել։ Այդ ներուժը ծառայությունների բարելավմանը ծառայեցնելու համար անհրաժեշտ են տեղական պայմաններին քաջատեղյակ, տեխնիկական գիտելիքներ և ռեսուրսներ ունեցող կազմակերպություններ։ Քաղաքային իշխանությունների հետ նրանք կփորձարկեն մոտեցումները և պատասխանատու կերպով կընդլայնեն հաջողվածների կիրառումը։

Այսօր OpenAI Foundation-ը և Ռոքֆելլերի հիմնադրամը մեկնարկում են «Cities Deliver․ ԱԲ լուծումներ հանրային ծառայությունների համար»⁠ նախաձեռնությունը՝ 50 միլիոն դոլար բյուջեով։ Այն կաջակցի կազմակերպություններին, որոնք քաղաքային իշխանությունների հետ ԱԲ-ի միջոցով լուծում են բնակիչների առջև ծառացած խնդիրները։

Համաշխարհային բաց մրցույթի միջոցով Cities Deliver-ը կտրամադրի 500 հազարից 2 միլիոն դոլարի դրամաշնորհներ՝ 24 ամսվա համար։ Նախաձեռնության նպատակն է ֆինանսավորել կազմակերպությունների, որոնք միասին կարող են հասնել աշխարհի քաղաքների մինչև 100 միլիոն բնակչի։

Ելակետը քաղաքների լուծելիք խնդիրներն են

Cities Deliver-ը փնտրում է նախագծեր, որոնք հիմնված են տեղական առաջնահերթությունների վրա և օգտագործում են առաջադեմ ԱԲ գործիքների նորագույն հնարավորությունները՝ հանրային ծառայությունների մատուցումը բարելավելու համար։

Բաց մրցույթը կկենտրոնանա չորս ուղղության վրա՝

• Հանրային առողջություն․ հանրային առողջապահական համակարգերի հասանելիության և պատրաստվածության ընդլայնում՝ ներառյալ առաջնային բուժօգնությունը, հիվանդությունների համաճարակաբանական հսկողությունը, հաշմանդամություն ունեցող անձանց ծառայությունները, սննդի հասանելիությունն ու սնուցումը։

• Տնտեսական առաջընթաց․ գործազուրկ և թերզբաղված բնակիչներին եկամուտ ստանալու, հմտություններ ձեռք բերելու և նպաստներից օգտվելու հնարավորությունների տրամադրում՝ ներառյալ նպաստների գրանցումը, կարիերայի ուղղորդումը, հմտությունների հիման վրա աշխատանքի ընդունումը և գործատուների կարիքներին համապատասխան ուսուցումը։

• Բնապահպանական դիմակայունություն․ օգնություն քաղաքներին՝ կանխատեսելու բնապահպանական ցնցումները, դիմակայելու դրանց և վերականգնվելու՝ այդ թվում հանրային անվտանգության, արտակարգ ծառայությունների, էներգետիկ ենթակառուցվածքների և հողերի կառավարման միջոցով։

• Քաղաքացիական ներգրավվածություն․ լուծումներ, որոնք օգնում են քաղաքային իշխանություններին սեփական նախաձեռնությամբ կապ հաստատել բնակիչների հետ և ավելի արագ արձագանքել՝ սպասարկման երկկողմ կապի ուղիներից մինչև որոշումների մասնակցային կայացում։ Ներառում է թվային հասանելիությունն ու կապը, դատական ծառայությունները, թույլտվությունների տրամադրման և կարգավորման գործընթացները։ Քվեարկության կամ ընտրությունների հետ կապված նախագծերը չեն ներառվում։

Cities Deliver-ը ողջունում է նախագծեր, որոնք առաջադեմ ԱԲ-ն համատեղում են քաղաքներում արդեն օգտագործվող գործնական գործիքների և համակարգերի հետ։ Դիմորդները կարող են ընտրել իրենց կարիքներին առավել համապատասխան ԱԲ մոդելներն ու արտադրանքները․ OpenAI-ի տեխնոլոգիաների օգտագործումը պարտադիր չէ և նախապատվություն չի տալիս։ Cities Deliver-ը փնտրում է թիմեր, որոնք լավ են ճանաչում այն համայնքները, որոնց ցանկանում են ծառայել, կարող են տեխնոլոգիաներ ներդնել կառավարման մարմիններում և ունեն գնահատման, գաղտնիության, անվտանգության ու երկարաժամկետ կայունության ապահովման հստակ ծրագրեր։

Cities Deliver-ը կաջակցի զարգացման երկու փուլում գտնվող նախագծերի։ Մեկնարկային դրամաշնորհները՝ 500 հազարից մինչև 1 միլիոն դոլարից պակաս գումարով, կօգնեն կազմակերպություններին քաղաքային գործընկերների հետ մշակել գաղափարը, ստեղծել նախատիպ, այն փորձարկել իրական օգտատերերի հետ և լուծումը փորձնականորեն ներդնել քաղաքում։ Ընդլայնման դրամաշնորհները՝ 1 միլիոնից 2 միլիոն դոլար, կաջակցեն քաղաքում արդեն փորձարկված և նախնական արդյունքներ գրանցած լուծումներին՝ օգնելով դրանք հասանելի դարձնել ավելի շատ բնակիչների կամ ներդնել այլ քաղաքներում։

Յուրաքանչյուր նախագիծ պետք է ղեկավարվի մասնակցության պայմաններին համապատասխանող կազմակերպության կողմից և ծառայի բարեգործական նպատակի։ Դիմել կարող են ոչ առևտրային կազմակերպությունները, հանրօգուտ կորպորացիաները և որոշ առևտրային կազմակերպություններ։ Յուրաքանչյուր նախագիծ պետք է իրականացվի քաղաքային իշխանության գործընկեր կառույցի հետ, որը հանձնառու է համայնքի համար արդյունքների և ազդեցության ապահովմանը։ Քաղաքային իշխանությունները չեն կարող դիմել անմիջապես։ Մասնակցության բոլոր չափանիշներին ծանոթացեք նախաձեռնության կայքում⁠։

Հենվելով քաղաքների արդեն կուտակած փորձի վրա

Այս աշխատանքը բխում է Ռոքֆելլերի հիմնադրամի և OpenAI-ի՝ 2023 թվականին սկսած ջանքերից։ Այդ ժամանակ նրանք համախմբեցին վեց մայրցամաքներից ավելի քան 40 համայնքային առաջնորդի՝ ուսումնասիրելու, թե ինչպես կարող է ԱԲ-ն բարելավել քաղաքային ծառայությունները։

Այդ քննարկումների արդյունքում առաջին նախագծերը մեկնարկեցին Կալիում՝ Կոլումբիա, Քեյփթաունում՝ Հարավաֆրիկյան Հանրապետություն, և Ռիո դե Ժանեյրոյում՝ Բրազիլիա։ Կալիում Dengue.AI⁠-ը կանխատեսում է հիվանդության բռնկումները՝ օգնելով հանրային առողջապահության պատասխանատուներին թիրախավորել կանխարգելման ջանքերը։ Քեյփթաունում ԱԲ-ով աշխատող հաղորդագրությունների հարթակը⁠ բնակիչներին օգնում է շփվել տեղական իշխանությունների հետ։ Ռիոյում WhatsApp-ի չատբոտը⁠ ջրհեղեղի մասին ահազանգերն ու բնակիչների հաղորդումները փոխանցում է քաղաքի արտակարգ արձագանքման համակարգերին։

Cities Deliver-ը հենվում է այս առաջին նախագծերի վրա՝ բացահայտելու խոստումնալից մոտեցումներ, դրանք փորձարկելու բնակիչների ու հանրային ծառայողների հետ և պարզելու, թե ինչպես հաջողված լուծումները ներառել քաղաքներում արդեն գործող ծառայությունների և համակարգերի մեջ։

ԱԲ-ի օգուտներն ավելի հասանելի դարձնելը

OpenAI Foundation-ի առաքելությունն է ապահովել, որ արհեստական ընդհանուր բանականությունը օգուտ բերի ողջ մարդկությանը։ Մեր «Քաղաքացիական հասարակություն և բարեգործություն» ծրագիրն այդ առաքելությունը գործի է վերածում՝ օգնելով համայնքներին արդեն հիմա և լայն մասշտաբով օգտվել ԱԲ-ի առավելություններից։

Cities Deliver-ը շարունակում է մեր ջանքերը՝ կյանքեր փրկող բժշկական նորարարությունները բոլորին հասանելի դարձնելու⁠, փոքր ֆերմերային տնտեսություններին ԱԲ-ի միջոցով եղանակի և մշակաբույսերի հիվանդությունների կանխատեսումներ⁠ տրամադրելու և ԱԲ օգտակար գործիքների աշխատանքը հնարավորինս շատ լեզուներով ապահովելու⁠ ուղղությամբ։ Այն նաև հենվում է «ԱԲ՝ նախ և առաջ մարդկանց համար» հիմնադրամի⁠ աշխատանքի վրա։ Հիմնադրամն օգնում է ոչ առևտրային կազմակերպություններին ուսումնասիրել, թե ինչպես կարող է ԱԲ-ն օգնել տեղական համայնքներին։ Cities Deliver-ի միջոցով մենք այս աշխատանքը տարածում ենք հիմնական հանրային ծառայությունների վրա, որոնցից բնակիչներն օգտվում են ամեն օր։ Այս բոլոր նախաձեռնություններում մենք ԱԲ-ի առաջընթացը համադրում ենք խնդիրներին ամենից մոտ կանգնած կազմակերպությունների փորձառության հետ՝ նոր հնարավորությունները վերածելով մարդկանց համար գործնական օգուտների։

Cities Deliver-ի հայտերի ընդունումն արդեն բաց է։ Նախագծային առաջարկները (ներառյալ կարճ տեսանյութը) պետք է ներկայացնել մինչև 2026 թվականի նոյեմբերի 29-ը։ Դիմեք այստեղ⁠։