ਆਵਾਜ਼ ਨਾਲ ਸ਼ੁਰੂ ਕਰਦਿਆਂ, AI ਦੇ ਲਾਭਾਂ ਦਾ ਦਾਇਰਾ ਵਿਸ਼ਾਲ ਕਰਨਾ
ਅੱਜ OpenAI Foundation ਦੁਨੀਆ ਭਰ ਦੀਆਂ ਭਾਸ਼ਾਵਾਂ ਵਿੱਚ AI ਦੀ ਕਾਰਜਕੁਸ਼ਲਤਾ ਯਕੀਨੀ ਬਣਾਉਣ ਲਈ ਗੇਟਸ ਫਾਊਂਡੇਸ਼ਨ ਅਤੇ ਦੁਨੀਆ ਭਰ ਦੇ ਭਾਈਵਾਲਾਂ ਨਾਲ ਸਾਂਝੀ ਪ੍ਰਤੀਬੱਧਤਾ ਵਿੱਚ ਸ਼ਾਮਲ ਹੋ ਗਈ ਹੈ।
AI ਦੇ ਲਾਭਾਂ ਤੱਕ ਪਹੁੰਚ ਇਸ ਗੱਲ ਤੋਂ ਸੀਮਤ ਨਹੀਂ ਹੋਣੀ ਚਾਹੀਦੀ ਕਿ ਕੋਈ ਵਿਅਕਤੀ ਕਿਹੜੀ ਭਾਸ਼ਾ ਬੋਲਦਾ ਹੈ। ਫਿਰ ਵੀ ਅਰਬਾਂ ਲੋਕਾਂ ਲਈ, ਖ਼ਾਸਕਰ ਉਨ੍ਹਾਂ ਲੋਕਾਂ ਲਈ ਜਿਨ੍ਹਾਂ ਦੀਆਂ ਭਾਸ਼ਾਵਾਂ ਨੂੰ ਤਕਨਾਲੋਜੀ ਵਿੱਚ ਲੰਮੇ ਸਮੇਂ ਤੋਂ ਲੋੜੀਂਦੀ ਤਵੱਜੋ ਨਹੀਂ ਮਿਲੀ, ਅੱਜ ਦੇ AI ਮਾਡਲ ਕਾਫ਼ੀ ਘੱਟ ਸਮਰੱਥ ਅਤੇ ਘੱਟ ਲਾਭਦਾਇਕ ਬਣੇ ਹੋਏ ਹਨ।
AI ਦੇ ਲਾਭ ਵਿਆਪਕ ਤੌਰ 'ਤੇ ਸਾਂਝੇ ਹੋਣ ਨੂੰ ਯਕੀਨੀ ਬਣਾਉਣ ਵਿੱਚ ਮਦਦ ਲਈ, ਸਾਡੀ ਯੋਜਨਾ ਘੱਟ-ਸਰੋਤ ਵਾਲੀਆਂ ਭਾਸ਼ਾਵਾਂ ਵਿੱਚ ਮਾਡਲ ਦੀ ਕਾਰਗੁਜ਼ਾਰੀ ਨੂੰ ਬਿਹਤਰ ਬਣਾਉਣ ਨੂੰ ਆਪਣੇ ਕੰਮ ਦਾ ਇੱਕ ਪ੍ਰਮੁੱਖ ਕੇਂਦਰ ਬਣਾਉਣ ਦੀ ਹੈ। ਅਸੀਂ ਆਵਾਜ਼-ਅਧਾਰਿਤ AI ਲਈ ਡੇਟਾ ਅਤੇ ਬੁਨਿਆਦੀ ਢਾਂਚੇ ਤੋਂ ਸ਼ੁਰੂਆਤ ਕਰਾਂਗੇ, ਜਿੱਥੇ ਕਾਰਗੁਜ਼ਾਰੀ ਅਤੇ ਉਪਲਬਧ ਡੇਟਾ ਵਿੱਚ ਪਾੜਾ ਖਾਸ ਤੌਰ 'ਤੇ ਬਹੁਤ ਵੱਡਾ ਹੈ, ਅਤੇ ਉਨ੍ਹਾਂ ਭਾਸ਼ਾਵਾਂ 'ਤੇ ਧਿਆਨ ਕੇਂਦਰਿਤ ਕਰਾਂਗੇ ਜਿਨ੍ਹਾਂ ਨੂੰ ਲੋੜੀਂਦਾ ਵਪਾਰਕ ਨਿਵੇਸ਼ ਮਿਲਣ ਦੀ ਸੰਭਾਵਨਾ ਨਹੀਂ ਹੈ।
ਬਹੁਤ ਸਾਰੇ ਲੋਕਾਂ ਲਈ, ਬੋਲ ਕੇ ਗੱਲ ਕਰਨਾ ਤਕਨਾਲੋਜੀ ਦੀ ਵਰਤੋਂ ਕਰਨ ਦਾ ਸਭ ਤੋਂ ਕੁਦਰਤੀ ਅਤੇ ਸੁਗਮ ਤਰੀਕਾ ਹੈ। ਸਮਰੱਥ ਆਵਾਜ਼ ਮਾਡਲ ਸਾਡੇ ਗ੍ਰਾਂਟ ਪ੍ਰਾਪਤ ਕਰਨ ਵਾਲਿਆਂ ਅਤੇ ਕਈ ਹੋਰ ਸੰਸਥਾਵਾਂ ਨੂੰ ਕਿਤੇ ਵੱਧ ਭਾਈਚਾਰਿਆਂ ਦੀ ਸੇਵਾ ਕਰਨ ਵਿੱਚ ਮਦਦ ਕਰ ਸਕਦੇ ਹਨ। ਸਿਹਤ ਸੇਵਾ ਨੂੰ ਫ਼ੋਨ ਕਰਨ ਵਾਲਾ ਕੋਈ ਮਰੀਜ਼ ਆਪਣੇ ਲੱਛਣ ਦੱਸ ਸਕਦਾ ਹੈ, ਆਪਣੀ ਮਾਂ-ਬੋਲੀ ਵਿੱਚ ਫਾਲੋ-ਅੱਪ ਸਵਾਲਾਂ ਦੇ ਜਵਾਬ ਦੇ ਸਕਦਾ ਹੈ, ਅਤੇ ਸਹੀ ਦੇਖਭਾਲ ਨਾਲ ਜੁੜ ਸਕਦਾ ਹੈ। ਆਪਣੀ ਭਾਸ਼ਾ ਵਿੱਚ ਬੋਲ ਕੇ ਸਵਾਲ ਪੁੱਛਣ ਵਾਲੀ ਕਿਸੇ ਕਿਸਾਨ ਨੂੰ ਆਪਣੇ ਖੇਤ ਅਤੇ ਫ਼ਸਲ ਦੇ ਹਿਸਾਬ ਨਾਲ ਤਿਆਰ ਕੀਤੀ ਗਈ ਬਿਜਾਈ ਦੀ ਸਲਾਹ ਮਿਲ ਸਕਦੀ ਹੈ।
ਦੁਨੀਆ ਦੀ ਸਭ ਤੋਂ ਵੱਡੀ NGOਬ੍ਰੈਕ ਦੇ CEO ਆਸਿਫ਼ ਸਾਲੇਹਦਾ ਕਹਿਣਾ ਹੈ ਕਿ, “ਜਦੋਂ [ਬ੍ਰੈਕ] ਨੇ ਬੰਗਲਾਦੇਸ਼ ਵਿੱਚ ਆਪਣੇ ਸਿਹਤ ਕਰਮਚਾਰੀਆਂ ਲਈ AI ਸਕ੍ਰਾਈਬ ਬਣਾਉਣ ਦੀ ਸ਼ੁਰੂਆਤ ਕੀਤੀ, ਤਾਂ ਬੰਗਲਾ ਵਿੱਚ ਮਾਡਲਾਂ ਦੀਆਂ ਸੀਮਾਵਾਂ ਨੇ ਸਾਨੂੰ ਰੋਕ ਦਿੱਤਾ। ਜਿਨ੍ਹਾਂ ਭਾਈਚਾਰਿਆਂ ਦੀ ਅਸੀਂ ਸੇਵਾ ਕਰਦੇ ਹਾਂ, ਉਨ੍ਹਾਂ ਲਈ ਆਵਾਜ਼ ਹੀ ਇਸ ਤਕਨਾਲੋਜੀ ਤੱਕ ਪਹੁੰਚਣ ਦਾ ਇੱਕੋ-ਇੱਕ ਵਿਹਾਰਕ ਤਰੀਕਾ ਹੈ, ਇਸ ਲਈ ਸਾਡੀ ਭਾਸ਼ਾ ਵਰਗੀਆਂ ਭਾਸ਼ਾਵਾਂ ਵਿੱਚ ਇਸ ਨੂੰ ਸਹੀ ਕਰਨਾ ਇਹ ਤੈਅ ਕਰੇਗਾ ਕਿ AI ਸਾਡੇ ਤੱਕ ਪਹੁੰਚਣ ਵਾਲੇ 14.5 ਕਰੋੜ ਲੋਕਾਂ ਲਈ ਅਸਲ ਵਿੱਚ ਲਾਭਦਾਇਕ ਬਣਦੀ ਹੈ, ਜਾਂ ਫਿਰ ਉਨ੍ਹਾਂ ਦੀ ਜ਼ਿੰਦਗੀ ਵਿੱਚ ਬਹੁਤਾ ਫ਼ਰਕ ਨਹੀਂ ਪਾਉਂਦੀ ਹੈ।”
AGI ਦੇ ਲਾਭ ਪੂਰੀ ਮਾਨਵਤਾ ਤੱਕ ਪਹੁੰਚਾਉਣ ਲਈ ਇਸ ਚੁਣੌਤੀ ਉੱਤੇ ਸਾਰਥਕ ਤਰੱਕੀ ਕਰਨੀ ਬਹੁਤ ਜ਼ਰੂਰੀ ਹੈ। ਅਸੀਂ ਉਨ੍ਹਾਂ ਸੰਸਥਾਵਾਂ, ਦੇਸ਼ਾਂ ਅਤੇ ਆਗੂਆਂ ਦੇ ਸਮੂਹ ਦਾ ਹਿੱਸਾ ਬਣ ਕੇ ਮਾਣ ਮਹਿਸੂਸ ਕਰ ਰਹੇ ਹਾਂ ਜੋ ਇਸ ਪਾੜੇ ਨੂੰ ਮਿਟਾਉਣ ਲਈ ਵਚਨਬੱਧ ਹਨ, ਅਤੇ ਆਪਣੇ ਭਾਈਵਾਲਾਂ ਨਾਲ ਮਿਲ ਕੇ ਇਸ ਕੰਮ ਨੂੰ ਅੱਗੇ ਵਧਾਉਣ ਸਮੇਂ ਹੋਰ ਜਾਣਕਾਰੀ ਸਾਂਝੀ ਕਰਨ ਲਈ ਉਤਸੁਕ ਹਾਂ।
