Tairbhí IS a leathnú, ag tosú leis an nguth
Inniu, chuaigh OpenAI Foundation i bpáirt le Fondúireacht Gates agus comhpháirtithe ar fud an domhain i ngealltanas comhroinnte chun a chinntiú go n-oibríonn IS i dteangacha uile an domhain.
Níor cheart go mbeadh rochtain ar thairbhí IS ag brath ar an teanga a labhraíonn duine. Ach do na billiúin duine, go háirithe dóibh siúd ar fhág an teicneolaíocht a dteangacha ar lár le fada, tá samhlacha IS an lae inniu i bhfad níos lú cumais agus úsáideachta fós.
Chun cabhrú lena chinntiú go roinntear tairbhí IS go forleathan, tá sé beartaithe againn díriú go mór inár gcuid oibre ar fheidhmíocht samhlacha i dteangacha ar bheagán acmhainní a fheabhsú. Tosóimid le sonraí agus bonneagar le haghaidh IS ghutha, réimse ina bhfuil bearnaí an-mhór san fheidhmíocht agus sna sonraí atá ar fáil, agus díreoimid ar theangacha nach dócha go meallfaidh siad dóthain infheistíochta tráchtála.
I gcás go leor daoine, is í an chaint an bealach is nádúrtha agus is inrochtana leis an teicneolaíocht a úsáid. D’fhéadfadh samhlacha cumasacha gutha cabhrú le faighteoirí ár ndeontas agus le go leor eagraíochtaí eile freastal ar i bhfad níos mó pobal. D’fhéadfadh othar a chuirfeadh glaoch ar sheirbhís sláinte cur síos a dhéanamh ar a chuid siomptóm, ceisteanna breise a fhreagairt ina theanga féin agus an cúram cuí a fháil. D’fhéadfadh feirmeoir a chuirfeadh ceist os ard ina teanga féin comhairle curadóireachta a fháil a bheadh curtha in oiriúint dá píosa talún agus dá barr.
Deir Asif Saleh, POF BRAC, an eagraíocht neamhrialtasach is mó ar domhan: “Nuair a thug [BRAC] faoi scríobhaí IS a chruthú dár n-oibrithe sláinte sa Bhanglaidéis, chuir teorainneacha na samhlacha sa Bheangáilis bac orainn. I gcás na bpobal ar a bhfreastalaímid, is í an chaint an t-aon bhealach praiticiúil leis an teicneolaíocht seo a úsáid. Dá bhrí sin, cinnfidh a fheabhas a éiríonn linn í a chur ag obair i dteangacha cosúil lenár dteanga féin cé acu a bheidh IS fíorúsáideach don 145 milliún duine a shroichimid nó nach ndéanfaidh sí mórán difríochta dóibh.”
Chun a chinntiú go rachaidh IGS chun tairbhe don chine daonna uile, ní mór dul chun cinn suntasach a dhéanamh maidir leis an dúshlán seo. Táimid bródúil as a bheith páirteach sa chomhghuaillíocht eagraíochtaí, tíortha agus ceannairí atá tiomanta don bhearna seo a dhúnadh, agus táimid ag súil le tuilleadh a roinnt de réir mar a fhorbraímid an obair seo lenár gcomhpháirtithe.
