OpenAI Foundation బోర్డులో పాల్ క్రిస్టియానో చేరిక
పాల్ క్రిస్టియానో ఫౌండేషన్‌కు చెందిన సేఫ్టీ మరియు సెక్యూరిటీ కమిటీలో కూడా చేరనున్నారు.
OpenAI Foundation బోర్డులో పాల్ క్రిస్టియానో నియామకాన్ని ప్రకటిస్తున్నాం. ఆయన OpenAI గ్రూప్ పీబీసీ బోర్డులో ఓటు హక్కు లేని పరిశీలకుడిగా ఉంటారు.
పాల్ ఫౌండేషన్ బోర్డుకు చెందిన సేఫ్టీ మరియు సెక్యూరిటీ కమిటీలోనూ చేరి, దాని అధ్యక్షుడు జీకో కోల్టర్‌తో కలిసి పనిచేస్తారు. OpenAI గ్రూప్ పీబీసీతో సహా OpenAI అంతటా భద్రత, రక్షణ పద్ధతులపై సేఫ్టీ మరియు సెక్యూరిటీ కమిటీ పాలనాపరమైన పర్యవేక్షణ అందిస్తుంది.
అమెరికాకు చెందిన జాతీయ ప్రమాణాలు, సాంకేతికత సంస్థ (ఎన్ఐఎస్‌టీ)లోని కృత్రిమ మేధ ప్రమాణాలు, ఆవిష్కరణల కేంద్రం (సీఏఐఎస్ఐ)లో పనిచేసిన పాల్‌కు, రెండు ప్రభుత్వాల హయాంలో సేవలందించిన అనుభవం ఉంది. వాణిజ్య శాఖ పరిధిలోని ఈ సంస్థలో ఆయన సీనియర్ సాంకేతిక సలహాదారుగా ఉన్నారు. సీఏఐఎస్ఐ, దాని పూర్వరూపమైన అమెరికా కృత్రిమ మేధ భద్రతా సంస్థల్లో పనిచేసిన సమయంలో, పాల్ అత్యాధునిక కృత్రిమ మేధ మోడళ్లను మూల్యాంకనం చేశారు. ఇందులో జాతీయ భద్రతపై ప్రభావం చూపే సామర్థ్యాల మూల్యాంకనంతో పాటు, వాటికి సంబంధించిన భద్రత, రక్షణ ముప్పులను తగ్గించే విధానాలపై కృషి కూడా ఉంది.
పాల్ అనుసంధాన పరిశోధన కేంద్రం (ఏఆర్‌సీ) వ్యవస్థాపకుడు కూడా. ఈ లాభాపేక్షలేని పరిశోధనా సంస్థ అధునాతన కృత్రిమ మేధ వ్యవస్థలను మానవ ప్రయోజనాలకు అనుగుణంగా తీర్చిదిద్దడంపై దృష్టి పెడుతుంది. 2017 నుంచి 2021 వరకు, OpenAIలో కృత్రిమ మేధను మానవ లక్ష్యాలకు అనుగుణంగా తీర్చిదిద్దే పరిశోధనకు పాల్ నాయకత్వం వహించారు. హ్యూమన్ ఫీడ్‌బ్యాక్ నుంచి రీఇన్‌ఫోర్స్‌మెంట్ లెర్నింగ్ (RLHF)కు పునాది వేసిన కృషిలో భాగస్వామి అయ్యారు. ఈ కొత్త బాధ్యతలో, OpenAI లక్ష్యసాధనకు కీలకమైన పాలనాపరమైన నిర్ణయాలకు పాల్ సాంకేతిక పరిజ్ఞానంపై ఆధారపడిన ప్రత్యేక దృక్పథాన్ని అందిస్తారు.
మరింత సమర్థంగా మారుతున్న కృత్రిమ మేధ వ్యవస్థలు లేవనెత్తే అత్యంత క్లిష్టమైన ప్రశ్నలపై పాల్ లోతైన పరిశోధన చేశారు. ఈ కృషితో, కృత్రిమ మేధను మానవ లక్ష్యాలకు అనుగుణంగా తీర్చిదిద్దే పరిశోధనా రంగానికి దిశానిర్దేశం చేశారు. OpenAI అత్యాధునిక కృత్రిమ మేధను అభివృద్ధి చేసి, వినియోగంలోకి తెస్తున్న ఈ తరుణంలో, ప్రభుత్వంలో అత్యాధునిక కృత్రిమ మేధ భద్రత, ప్రమాణాలపై పనిచేసిన ఆయన అనుభవం, సాంకేతిక వివేచన బోర్డు పర్యవేక్షణను, సేఫ్టీ మరియు సెక్యూరిటీ కమిటీ పనితీరును బలోపేతం చేస్తాయి.
గత ఏడాదిలో కృత్రిమ మేధ సామర్థ్యాలు అత్యంత వేగంగా పెరిగాయి. అయితే దాన్ని మానవ లక్ష్యాలకు అనుగుణంగా తీర్చిదిద్దడం ఇప్పటికీ క్లిష్టమైన సాంకేతిక సమస్యగానే ఉంది. దీంతో సేఫ్టీ మరియు సెక్యూరిటీ కమిటీ బాధ్యత మునుపెన్నడూ లేనంత ముఖ్యంగా, సవాళ్లతో కూడినదిగా మారింది. నా వంతు సహకారం అందించేందుకు ఈ బృందంలో చేరడం ఎంతో ఉత్సాహంగా ఉంది.
కృత్రిమ మేధ సామర్థ్యాల పరంగా కొత్త శకంలోకి అడుగుపెడుతోంది. అందువల్ల ఈ వ్యవస్థల పురోగతికి తోడుగా పటిష్ఠమైన భద్రత, రక్షణ, మానవ లక్ష్యాలతో అనుసంధానం, పాలన ఉండటం మరింత ముఖ్యమవుతోంది. కృత్రిమ మేధను మానవ లక్ష్యాలకు అనుగుణంగా తీర్చిదిద్దడంపై సాగిన తన పరిశోధనా ప్రస్థానమంతటా పాల్ ఒక కీలక దృక్పథాన్ని అనుసరించారు. అధునాతన కృత్రిమ మేధ విపత్కర ముప్పులను కలిగించే అవకాశాన్ని తీవ్రంగా పరిగణించాలనీ, వ్యవస్థల సామర్థ్యాలు మరింత ప్రమాదకర స్థాయికి చేరకముందే వాటిని అభివృద్ధి చేసేవారు సిద్ధపడాలనీ ఆయన భావిస్తారు. ఈ రంగంలోని రక్షణ చర్యలు సరిపోతాయా అనే అంశంపై ఆయన స్వతంత్రంగా తన అభిప్రాయాలను వ్యక్తం చేస్తూ వచ్చారు. ప్రచలిత అంచనాలను సవాలు చేయడానికి సిద్ధంగా ఉండి, కీలక నిర్ణయాలకు ఆధారమైన సాక్ష్యాలు, రక్షణ చర్యలు, జవాబుదారీతనాన్ని బలోపేతం చేయడంలో తోడ్పడే వ్యక్తులతో ఫౌండేషన్ పాలన మరింత పటిష్ఠమవుతుందని మేం నమ్ముతున్నాం.
2025 అక్టోబర్‌లో OpenAI మూలధన పునర్వ్యవస్థీకరణ ద్వారా ఏర్పాటైన పాలనా నిర్మాణాన్ని పాల్ నియామకం మరింత ముందుకు తీసుకెళ్తుంది. ఇందులో కాలిఫోర్నియా అటార్నీ జనరల్, డెలావేర్ అటార్నీ జనరల్ ఏడాది పాటు నిర్వహించిన సమీక్షలకు సంబంధించి ఇచ్చిన హామీలు కూడా ఉన్నాయి. వారి భాగస్వామ్యం పాలనా చట్రాన్ని బలోపేతం చేయడానికి తోడ్పడింది.
OpenAI Foundation గురించి
కృత్రిమ మేధ యావత్ మానవాళికి మేలు చేసేలా చూడటానికి అంకితమైన దాతృత్వ సంస్థ OpenAI Foundation. వేరుగా ఉన్న లాభాపేక్షలేని సంస్థగా, ఫౌండేషన్ తన సొంత దాతృత్వ కార్యకలాపాలను నిర్వహిస్తుంది. అదే సమయంలో OpenAI గ్రూప్ పీబీసీపై నియంత్రణను కొనసాగిస్తూ, అందులో గణనీయమైన వాటాను కలిగి ఉంది. శాస్త్రీయ ఆవిష్కరణలను ముందుకు తీసుకెళ్లే, పౌర సమాజాన్ని బలోపేతం చేసే, బాధ్యతాయుతమైన కృత్రిమ మేధ ద్వారా సవాళ్లను తట్టుకునే సామర్థ్యాన్ని పెంచే కార్యక్రమాలకు ఫౌండేషన్ మద్దతు ఇస్తుంది. నిధులు, భాగస్వామ్యాలు, ఇతర దాతృత్వ కార్యక్రమాల ద్వారా ఫౌండేషన్ దీర్ఘకాల ప్రజాప్రయోజనాలను అందించే కృషిని వేగవంతం చేయడానికి తోడ్పడుతుంది. కృత్రిమ మేధతో సాధ్యమయ్యే విప్లవాత్మక మార్పుల ప్రయోజనాలను మరింత మందికి చేరువ చేస్తుంది.
OpenAI గ్రూప్ పీబీసీ ఫౌండేషన్ నియంత్రణలో ఉంది. సేఫ్టీ మరియు సెక్యూరిటీ కమిటీ ఫౌండేషన్ బోర్డులోని ఒక కమిటీ. మరిన్ని వివరాలకు www.openaifoundation.org చూడండి.
*సీనియర్ సాంకేతిక సలహాదారుగా, పాల్ OpenAIకి సంబంధించిన అన్ని వ్యవహారాలతో పాటు అన్ని మోడల్ మూల్యాంకనాల నుంచి తప్పుకుంటారు.